Abfallentsorgung und Recycling

E Biitrag of SRF News het mi zo dem Thema bewoge. Es goht im Allgemeine um oise Abfall ond wie d'Gsellschaft demit umgoht.
srf.ch/news/schweiz/hausmuell-im-oeffentlichen-kuebel-winterthur-bekommt-sein-abfallproblem-nicht-in-den-griff

Ich ha Müeh demet, wie gwössi Lüüt Null Skrupel händ, ihre Abfall i d'Wält uszsetze.
Das Thema esch riesig. Bem SRF-Bitrag gohts drom, dass es paar Halbschüeh eifach es paar Franke wänd für Gebühresäck spare. Es goht aber natürlech no vel witer:

- Abfallgebühre ned welle zahle (Gebühresäck)
- Recycling: ned rechtig oder gar ned trenne
- Abfall i d'Umwält schmeisse (landet a velne Ort oft im Meer oder sosch noime wos Tier schädiget (Chuehweide etc.))

Ich fendes eifach schad dass mers ned mol imene guet situierte Land wie d'Schwiiz härebechömet. Wenn be ois Gmeind- oder Stadt-Ahgstellti ned regelmässig wörde fötzele, denn wörds be ois ade Strosseränder au ned besser als i gwössne andere Länder usgseh.
Was muess falsch i gwössne Chöpfli laufe, dass mer fendet, es esch OK de Sack vom McDonald's usem Auto z'schmeisse? Oder ebe so Gschichte wie z'Winti.
Oder lueget mol öffentlechi Entsorgigstelle ah, was det alles häregstellt werd wo det nüt verlore het...

Wie stönd ehr dezue? Triggeret euch das au oder loht euch das chalt?