Was hasse ich im Alltag

Also bi mir isch es, wenn de Zug z'spät chunt oder s'Internet lahmt. Aber au wenn ich mues warte, bis dass de Kafi fertig isch.😂 Und natürli das morgendliche Uufstah, das isch wahrschins s'Allerärgschte! Aso, euse Alltag hät halt so die Tücke, gell? 😅

Dass in Microsoft Teams ned existiert!

Dass d'Chunde immer genau denn alüted, wenn ich am Zähputze bin 😆
Und d'Matratze frisch bezieh. Lüt landed mit Rakete uf Komete, schicked Roböterli uf de Mars aber es git immer no kei Lösig für e fucking Matratze

Ufstoh

Das praktisch jede Tag z wenig Stonde hed.
Zwar chan mer jo au no d Nacht dezue neh, wenn mer meh well erledige, aber das esch uf duur au kei lösig...
Fakt esch: 24h send z wenig!

Dummi Mönsche!🤣

S'Wort Alltag per se.

Jetzt nüme, aber das es s TM so lang nüme geh het als ziitvertriib <3

Mänsche wo vord Bustüre anestönd und s Gfühl händ d Welt lauft um sie ume

Dasi so wenig Bilder vo mir ha

Und dass es do im TM kei Smiley-Button git!I weiss doch die ganze codes nümme

Wenn im Resti feins Esse bstellsch und sich s vermeintliche Peterli sich as Korriander usestellt. Peterli isch liebi, Korriander isch evil 😤

- Mensche, wo anderi Mensche für ganz normali, menschlichi Verhaltenswiise und Bedürfnis judged, statt Mitgfühl hend
- Rechti, Neoliberali, Essenzialist:inne und allgemein Lüüt ohni kritischi Istellig, aber trotzdem vill oder vehementi Meinig
- Spaghetti us Versehe z'lang im Wasser la

Hasse ned, aber es nervt mi ame, wenn d Lüt motze, well mer verspötig hei, d Lüt aber alli be einere Töre wänd itiege. En Zog het emfau meh als nor 1 Töre!! Verteilet euch doch!
Oder de hesch verspötig ond de chond no eine zseckle ond zeigt der de Stenkfenger well d Töre scho zue send. Sorry schust scho zspot, cha ned of jede warte. Besch haud zfrüeh före nöchst

am morge us de hütte ohni erste kaffi
passiert mir zwor selte ^^ aber wenn es passiert… laufed um eues lebe 🤪 bin nanig recht ansprechbar 🙈

Wenn mikrowelle popcorn machsch und nie fertig bringsch, alli ufzp(l)oppe lah oder ohni dass si verbrönned


Aber hauptsach Aromat druf denn schmöckeds wenigstens doch no guet

lüüt wo im öV ohni kopfhörer videos luagend odr musig losend

wänn jungi lüüt begriff verwendet, wo ich altä boomer nümä verstuh und das ganzä au nu ab dä 8ti am abig!

Wenn usme 10 Minute Arbetswäg wägem Stau eifach mal 25 Minute wird

- Lüüt wo ihri Zigis praktisch scho im Zug azünde, wells ned paar Sekunde warte chönt nachem Usstiige. (Ich hasse Zigis)
- Au en Koriander Hasserin
- Ebefalls wenn Lüüt am Morge früeh im Zug müend luut am Handy rede oder allg. wenn sie met Luutsprecher müend rede.
- Lüüt wo im Zug inem 2er Abteil müend bim Gang hocke, damet ihres Täschli bim Feischter gnueg Platz het, obwohl de Zug scho pumpe volle esch.
- Lüüt wo müend a Bode abe chodere (suscht gahts eu guet?)
- Chunde wo ihri Frogene eig. amigs sogar selber chönte beantworte mit es bitzli studiere oder luege/sueche.
- Wenn Mitarbeiter dir Sache abgebet, well sie selber z'fuul sind oder eifach kei Bock för das hend (ich ha natürli meh Bock uf das ähä)
- und ganz vieles meh, wo mir grad nöd i Sinn chunt

Wemes de chunde emmer und emmer weder muess säge dass s fahrzüg mindesten ein ganze arbeitstag vorem mfk termin i de werchstatt muess si und sis trotzdem ersch am termintag brenge... und ne de chef trotzdem i arsch chrücht so dass mer eus dörfe de arsch ufrisse dasses dore chonnt....

telefoniere

(Luuti) Schuelklasse im Zug.

Unverständlichi Scripts in Mathe.

Mönsche

Weme am haubi 10ni emmerno am schaffe esch 😫

referat vorbereita

Absolut ke schlofrhythmus zha

Der Drang ständig ungsunde Scheiss z snacke und hingerdrii mi schlächt z füehle. Ig liebe eifach Ässe

Weni vergiss Kaffi is Bialetti zfülle und denn eifach nur Wasser choche

Dasi sit 20 Mönet kei Nacht chan dureschlafe