Bis dass der Tod euch scheidet...

Hoi zäme!

Ähm, min schlimmschte Trennig? Da muesi gleich mol nacheme Chindheitstrauma inere Chindergartebeziehig grabele. 🤔 Aber hey, jede Trennig bringt mr dä Chanc, näxi Kapitel im Läbesbuch z'ufschlage, oder? 😜 Also denn, was sind äuri haarsträubendschte Trennigsstorys? Bin gspannt! ✨

Grüessli, Kai 🤪

min erste richtige Fründ het sich nach 9 Mönet Beziehig eifach nüm bi mir gmulde. Sis Mami isch dazumals schwer krank gsi und ihm ischs drum (und no wäg andere Gründ) recht schlecht gange und ich hanmer mega sorge gmacht um ihn, öppe e Wuche lang, nacher het er sich tatsächlich gmulde per SMS und gfunde ich seg eifach e schlechti Fründin wo sich nöd für ihn interessiert und ich seg nie für ihn da und er well nüm mit mir zäme si. bin damals am Bode zerstört gsi, aber eigentli ischs wüki Glück gsi dass er de Schlussstrich zoge het, er isch es riese Arschloch gsi und het mich scheisse behandlet, dTrennig isch eigentli human gsi degäge

(Per fax hättis aber no besser gfunde)

Min ex isch au es totals arschloch gsi, hät immer so psychospieli gmacht und mir a allem d schuld geh (au dass ich usegfunde han dass er allne andere fraue schribt und mi betroge hät isch natürli mini schuld gsi) eines abends häter denn gfunde er wüss nüm ob er mi no liebi - us em nüt.. hät dänn wenig später schluss gmacht und no am gliche tag minere chline cousine e liebeserklärig gschickt...

Ah und das isch öppe 6 jahr her und er belästigt mich immerna und versuecht mich z kontaktiere und erstellt für das sogar fake profil uf facebook

Mini allererschti grossi Liebi, hani mit 15ni im Internet keneglernt (dozumal na Mypix oder so) und mich mit ire z'Bremgarte troffe. Hend eus super verstande, umäKNUTSCHT . Nachdem ich dihei gsi bi, hani 2 Mönet nüt me ghört vo ire. Ich natürli im Tal des Todes. Nach 2 Mönet het si sich gmolde, si seg im Spital gsi und heg sich nöd chöne mälde, ires Handy heg kei Akku me gha.

Binere andere Ex (isch etz weniger e schlimmi Trennig, sondern me e schampar gschpässigi Sach!), die isch immer me Windfahne worde mental. Irgendwenn isch sie id Klinik cho für churzi Ziit. Mer hend denn es längers Gspröch gha, woni ire klar gmacht ha, dasis so nöd chan wiitermache. Bim usstiige usem Auto, het sie denn theatralisch d'Auge verdrület, mit de Hand e schwungvolli Geste gmacht und isch inere 360° Pirouette stilvoll z'Bode gsunke. Ich bi dermasse perplex gsi ab de Situation, dasi usem Auto usgstige bi und zu ire übere bi. Si isch denn "nöd aasprechbar" gsi. Han ere denn s'Gsicht liecht tätschlet ( im Sinn vo "Hey, ufwache") und sie het "Aua" gseit, isch nachher aber gad "wieder id Ohnmacht" gsunke. Und das 5x. Es wär eich lustig gsi, wens nöd so strub gsi wär. Ha sie nachher zum Iigang bracht (schlurfe het sie chöne). Ha det riese Glück gha...Isch mim Vater sin GTI gsi und hanen mit Schlüssel und Türe offe laufend sta la...

Nach mire 5-jährige Beziehig (isch etz ebefalls weniger e schlimmi Trennig, sondern me d'Nachwehe) hemmer zäme abgmacht, dass sie iri Sache na 2 Wuche bi mir lat und s'denn mit em Aahänger chunt go hole. Lustigerwiis sind aber am Mäntig (nachdem mer am Sunntig Schluss gmacht händ) gad 5 Kollege (ali arbetstätig) am Morge am 8ti vor de Hütte gstande und hend s'Züüg mitgno. MIr hend eich abgmacht gha, dass ich si in Rue "schaffe" lane und währenddesse wäg bi und wens färtig sind schnell chum go luege, was sie mitnimmt. Schlussendli hends denn zwar scho s'Richtige mitgno, aber de ganzi Abfall lige la. Hanene denn de Abfall ime unbeachtete Moment na hine in Aahänger inegstellt S'Beste isch au na gsi dass sie zum Wer-nimmt-was-Gspröch iri best Kollegin mitgno hät und die us unerklärliche Gründ uf 180 obe gsi isch (d'Trennig isch vo beide Siite us cho, kei Aanig, was si ire verzellt hät) und mich s'ganze Gspröch dur so aagluegt hät, als hetti ires Chatzebaby ertränkt. Nu scho dass sie zum Abschlussgspröch iri best Kollegin mitnimmt isch biz sehr grenzwertig, als Erwachseni.

ich persönlich finde eigentlich die trennige fasch am schlimmste, wo nüt "schlimms" oder "strubs" passiert isch und mer sich eigentlich im guete trennt, will mer irgendwie eifach merkt, dass mer ned s gliche vom läbe möcht oder liebi allei halt doch ned immer gnue isch.

will wenni ez iwie betroge oder mega schlecht behandlet wirde, denn isch das i dem moment natürlich uh schlimm, aber im nachhinein, mit echli abstand, chani denn mit guetem gwüsse säge, dassi ohni die person tatsächlich eifach besser dra bin. hingäge wemmer eigentlich miteme ganz tolle mensch zäme gsi isch unds ebe eifach us andere gründ, wo meh so chli verschwomme sind, ned wiitergange isch, denn fragsch di na relativ lang obs ned ächt doch no en chance gäb und vermissisch die person au sehr.

mir isch das zmindest mit mim exfründ eso gange wo mir eus vor 2 jahr trennt hend. so s'erst halbe jahr hätti gseit, isch denn würkli schwierig gsi für mich. nacher isch afange besser wärde, aber all die sache wo denn s'erst mol allei machsch (so jährlichi ritual z.B. wie gwüssi fest oder so) womer vorher immer zäme gmacht het, sind denn au glich immerna irgendwie seltsam.

mittlerwile bini ez scho relativ lang wieder sehr happy und trure dere beziehig auned nache, aber dänke gärn a die ziit und a ihn, willer würkli en sehr guete mensch isch und sini nächst partnerin sich dörf glücklich schätze

Hmmm selber scho paar erlebt aber ned "schlimm". Klar ha au scho Monate brucht zum über öpper hinwegcho. Aber die schlimmst trennig hani vor knapp 2 Jahr erlebt.
Min Dad isch a covid erchrankt. Sis immunsystem isch gschwächt gsi willer es jahr vorher magekrebs besiegt het.
Dezember 2021, min dad steckt sich mit covid bim schaffe ah... vo da a ischer de grösst teil vom 2022 im spital gsi. Er het sich immer wieder bitz erholt. Ständig neui medis becho, ständig wieder am besser werde und wieder am schlimmer werde. Er het sogar medis becho wo ned zuegla sind, er und 2 wiiteri mensche ide schwiiz sind die einzige testpatiente gsi. Irgendwenn hetter es chlises suurstoffgrät becho für dihei...demit hetter gnau 10 min dusse chöne go laufe biser wieder am aschlag gsi isch und het müse aneliege.
Irgendwenn ischer is spital cho und ane grossi maschine agschlosse worde, ha min dad no nie so dünn und gschwächt gse. ich ha aber immer denkt er erholt sich bald wieder. Ich binen drum leider nie sehr oft go bsueche im spital wili denkt ha es gaht sicher bald wieder berguuf
Am dunnstig 1 september 2022 hani en aruef is gschäft becho, mini schwöster in träne "chum in spital, de papi het vlt no paar stunde".

min dad isch so gschwächt gsi das de arzt ihm gseit het er wird sspital nie me chöne verlaa, er wird slebelang ade beatmigsmaschine sii. Er het sich degege entschiede...
Ich bi am gliche abig wieder hei go schlafe, am nächste tag lüüted mini mam ah und seit daser hüt abig medis bechunnt damiter nümm mues liide....
Ich bi am 2 september wieder is spital gange, min dad het selber ned gwüsst dases scho die nacht wird sii, er hets au ned selber welle entscheide sondern het d'entscheidig minere mom geh.
de tag a sim bett isch lang vergange, er het nix gahnt, mer hend zwar all ständig immer wieder chli ghüült...aber das isch die letschte täg normal gsi.... wo denn abig worde isch und extra min onkel us italie id schwiiz cho isch hets min dad scho gmerkt es gaht nümm lang.

Am abig bini hei will bsuechsziit fertig gsi isch, ich ha mi bi ihm verabschiedet, mer hend es letschts gspröch gha willer gmeint het er weiss ned wie lang er no hegi. mini mam isch bi ihm ufem krankebett glege und er het sie gfragt werum sie ned hei müesi ga. sie het ihm gseit "Schatz, hüt nacht gömmer zeme ufe reis, ich wird dich so wiit wies gaht begleite".... da het min dad s'kapiert. Er het dmedis übercho und het die ganz nacht degege akämpft izschlafe, er het so richtig hert kämpft, sis herz het voll welle lebe.... er het immer wieder mini mam agluegt, sie hend sich immer wieder küsst und sich gseit das sie sich liebed. am morge am 06.30 hetter ihre no eimal gseit daser sie liebt und isch igschlafe...

ich denks die trennig vo zwei persone wo sich so sehr liebed wie mini eltere isch extrem hert... klar chrieg, unfäll, was au immer isch herter. Aber da hets eim sherz wortwörtlich broche. mini mam isch sit da nümm die glich....

Ig ha gad ä rächt schlimmi Scheidig hingr mir nach 7 Jahr Bezihig und 4 Jahr dervo ghürate.
Mini Ex-Frau het mi agloge, was t Vaterschaft vo üsere erste Tochter ageit, das hani aber eis Jahr nach dr Geburt usegfunde und hase ihre verzeit.
Eigentlech hei mir gmeinsam ä Mediation wöue, aber die het sie 1 Tag vorher abgseit, im Hintergrund mitere Awältin es Eheschutzverfahre igleitet, wosi nur lüge über mi verbeitet het. Sie het mi us dr Wohnig gschosse ohni Hab und Guet und am Arbeitsplatz nur Lüge (hei zämä gschaffet) über mi verbreitet, dass ig ha müesse Chünde, wöus mir nüm wohl isch gsi.
Vor zwöi Mönät isch mi Grossvater gstorbe und ig bi gad psychisch sehr em Ändi gsi und hät ihri Hiuf brucht, z einzige was ig vore ghört ha isch: "Z Läbä isch kes Wunschkonzärt, du hesch Verpflichtie, haut di gfeuigst dra". Sit dem laht sie mit Chind nüm la gseh und wott nur no über Awält Kontakt, was ig mir nid cha leiste.